Mount Ijen

GUNUNG IJEN! 

Ändlich häts klapped und ich han en Usflug uf de Ijen chönne mache!!

De Ijen isch en aktive Vulkan uf de Insle Jawa (2769). De Kratersee Kawah Ijen (2386) isch de gröschti übersüürti See uf de Wält. 

De Usflug isch es chlises Abentür gsie und hät sich absolut glohnt. Mer sind am Abig am 22.30 abgholt worde vo dihei und zu de Fähre uf Jawa bracht worde. Uf de fähre bini gad mal ihglade worde zum s Stüürhuus ahluege!
In Jawa simmer wieder abgholt worde und öppe am halbi 2 (i de Nacht) in Paltuding (1850) ahcho. Am 2 ischs dän losgange und mer sind im dunkle uf de Vulkan gloffe. S isch rächt speziell gsie so im dunkle dur e gägend zlaufe wommer kei ahnig hät wies usgseht. Dobe ahcho simmer diräkt zum Kratersee abeklättered, mega ahsträngend gsie. De ijen isch en aktive Vulkan und sie baued dete (leider immerno) Sulfur ab. Lawa gseht mer kei aber mer gseht flüssigs Sulfur und schmöckts au seeehr guet.
S spezielle am Ijen isch s Bluefire wommer i de Nacht gseh chönt und sehr beiidruckend sii sött. Leider händ mir kei gseh wills z viel grägnet hät in letschter ziit. 
Mer sind dän nach me ziitli wieder ufeklättered und am Krater entlang gloffe zum de Sunneufgang zgseh. Leider hämmer au de nöd gseh wills wulchig gsie isch. Haha, glück muss mer ha!! 
Aber trotz de Wulche hämmer e wunderschöni Ussicht gha, die beiidruckendi Landschaft bi Tag chönne bestuhne und die wohlverdienti Pause chönne gnüsse.  S zrugg laufe hät sich ahgfühlt als wäremer ufere neue Wanderig, will mer dasmal gseh händ wies um eus ume usgseht. Am 7.30 simmer dän wieder zrugg in Paltuding gsie und händ eus uf de Heiwäg gmacht. Ingesammt simmer 12km gloffe und händ glaub öppe 1300 Höhemeter überwunde. Am 1 am Nammitag simmer wieder zrugg in Pemuteran gsie.

S isch es mega Erläbniss gsie und ich würd sofort wieder gah. Viellicht mit bitzli meh Glück.

Thank you Kristen for joining me! It was a pleasure to share this adventure with you!!